وعليكم السلام ورحمة الله
اي نعم أخوي الغالي أنا هو :) جزاك الله خير ع دعواتك الطيبة بالنسبة للدور الأول ناوي اركبها في الجدران ع الجوانب لأنها لاتقع في الواجهات والدور الثاني غرست ماسورتين بس وحدة للصالة والثانية لإحدى الغرف والثنتين واصلة لسطح الفيلا ، و لأن فيه شقة علوية ماراح اقدر اغرس لبقية الغرف اما الشقة العلوية فغرست لكل الغرف بسبب انها واصلة لسطح الشقة مباشرة وع فكرة الغرس كان يدوي واجتهاد مني شخصيا واخاف اني جبت العيد :d أمس رحت لإحدى محلات التكييف وقالي نمدد لك الحين كل شي داخل الجدران وسعر المتر 110 نحاس أمريكي وش الراي ؟ |
هذي صور صورتها قبل صب السقف وهي ماسورة إحدى الغرف في الملحق
https://dl.dropboxusercontent.com/u/...-924294413.jpg وهذى ماسورة لإحدى غرف الدور الثاني في سقف الفيلا مباشرة غرستها قبل الصب أيضا https://dl.dropboxusercontent.com/u/...-921579243.jpg |
اقتباس:
( نعم العلب تركب عند التكسير وقبل اللياسه |
الله يحييك ...الساعة المباركة ...
حتى الغرف الباقية لو حطيت ماصورة طويله وتركب المكيفات على سطح الملحق مافيه مشكلة .. واذا مابعد صبيت السقف فيمديك ...انا نفس الشي الغرف اللي تحت ملحق السطح رفعت المواصير لفوق سطح الملحق... وماعليك ماجبت العيد ولا رمضان حتى :D وقبل اللياسة جب اكواع سبليت وركبها وسكرها ترا المليسين ماعندك احد يلطسها ويمشي:p ...الله من علبة فيش لطسوها عندي:o وبالنسبة لتمديد النحاس انت وراك مستعجل ؟ التمديد مع تركيب المكيفات يعني قبل تسكن بليلة ان شاء الله:D يعني اذا مريت مع شارع المكيفات صد عنهم:p وسعرهم غالي ترا انا اللي اعرفه ان سعر المتر الزايد 75 للامريكي لان لك ترا 5 امتار مع المكيف .. |
الله يسعد حياتك ويطمن قلبك طمنتني
معليش ابي افهم شغلة تقول تركيب النحاس لاحقا اي قبل السكن طيب ايش السواة في الغرف الي مالها مواسير حتى الي مركبلها مواسير تنتهي حافة الماسورة مع نهاية البيمة يعني يلزم تكسير لين نقطة المكيف والا ؟ مافهمت وش تقصد باكواع السبلت |
اقتباس:
اذا قصدك اسفل الجسر فما عندك مشكلة بس انتبه للبناي بعدين لا يسكرها وكانك مخلص بناء تحت ايضا موب مشكلة يتم التكسير في البلك الى النقطه ( يعني عادي اهم شي مافيه تكسير في الجسر او اي خرسانه ) بس مشكلة الغرف الثانية ان الماصورة ماتتسع الا لنحاس مكيف واحد يعني ماراح تقدر تستفيد منها للغرف الثانية الحين انا فهمت انك خلاص صبيت السقف خلاص .... اذا صبتك جديده فمالك الا تجيب لك مهندس بـ 200 ريال وتشاوره انك تفتح في السقف بحكم انها صبة جديدة وممكن ماتتأثر ( الرأي له) ... طيب انت حطيت مواصير للدش ؟ والسباك هل مطلع مواصير زياده ممكن تستفيد منها لان بعضهم يزيد او تصير الماصورة كبيرة وفيها مجال ينزل نحاس مع جنب ماصورة التغذية للبيت .. الكوع توك عليه شوي ...اذا رحت للبيت صورته لك لان دورت في النت وما عرفت القاه... بس يبي لك تفكر من جديد في كهربائيك وهل انت متأكد انه جيد او مش حالك .. ابواب الخشب ومثلها ممكن الواحد يتساهل شوي بس شغل السباك والكهرب والانشاءات مايصلح نص ونص ...لان الغلط مكلف |
حياك الله أخوي الغالي
البيمة الي هي الميدة أو الجسر طبعا انا مخلص عظم كامل ساقف وباني وكل شي وببدأ في التشطيبات بس وحدة وحدة الكهربائي ماتعاقدت معاه بشكل كامل لا انما جبته وقت مد الخراطيم الحمرا في سقف الدورين والملحق . ومن ضمن الخراطيم الحمرا مطلع فوق في السطح يمكن ثلاث مخصصها للدش بحسب كلامه . يعني يمديني اختار لي كهربائي أفضل بإذن الله لبقية الفيلا . الي فهمته من كلامك ان الكهربائي يقدر يكسر من أسفل الجسر أي أول بلكة من الأعلى وينزل من الماسورة الي غرستها قبل صب السقف والجسر ويسوي نقطة ولاحقا يتم تركيب السبلت صحيح ؟ مسألة خرم السقف متخوف منها وبخليها آخر الحلول مشكلتي الوحيدة الآن هي الغرف الي فوقها جاي الملحق هل أطول مسافة التمديد لين سقف الملحق والا انزلها للأرض والاأعلقها بجانب الغرف ؟ |
اقتباس:
ميزة الفاهم من البداية انك تعلمه وش تبي مثلا غرفة الغسيل فيها نشاف وغسلات ومكيف يعني وضعها غير وضع الغرف العادية تحتاج ليات زيادة لان تبي كيبل اكبر مثلا .. انت الان خلاص معد عندك اي انشاءات والملاحق العلوية مخلصه ؟هذا اللي فهمته منك .. وفهمك لي صحيح ان الكهربائي يكسر في البلك اسفل الجسر عند الماصورة اللي انت مركب .. الغرف اللي فوقها ملحق اذا فيها ماصورة بس مشكلتك الملحق فطول الماصورة عادي وين المشكلة وتفتك من المكيفات بأنها تكون فوق الملحق وماتضايقك ...وتعليقها جبن الغرف فوق اولا فكر بالصيانة بعدين ..ثم شكلها مش ولابد وتنزيلها تحت بيشوه الشكل لانك بتمد ليات النحاس خارجي ... مشكلتك هذي لازم تحلها قبل اللياسه عشان لو فيه تكسير او شي .. بس عموما يمديك بس احرص على كهربائي كويس واكيد بيكون غالي عن الناس ...انا كنت مقاطع واحد على بيتي بـ 10000 وعند التكسير بدا يحوس وكنسلته وجبت واحد يكمل بـ19000بس والله ارتحت مره شغل نظيييف وفاهم بس قل وش تبي وهو يسويه بالطريقة الصح ...السباكة والكهرب يترتب على نجاحك فيها اشياء كثيرة بعدين واهم شي ((((السلامة)))) |
مشكور وبيض الله وجهك
غرف الملحق كلها فيها مواسير مغروسة في جسور السقف يعني أحطها فوق الملحق بكل سهولة أما غرف الدور الثاني والي جاي فوقها الملحق أطول التمديد لين فوق الملحق وتكون بشكل رأسي هذا الي تقصده صح ؟ غرف الدور الثاني والي فوقها سطح الفيلا مباشرة ثنتين وصالة حطيت لوحدة من الغرف ماسورة في الجسر والصالة ماسورة في جسر منتصف الفيلا ونسيت غرفة النوم الرئيسية :( طيب طول التمديد هل يؤثر على أداء المكيف ؟ راح يوصل يمكن ٧ أو ٨ متر . سؤال آخر كيف أحكم إغلاق فتحات المواسير بعد تمديد النحاس كي لايتسلل المطر والغبار ؟ |
اقتباس:
غرفة النوم تطل على مقدمة البيت ؟ وهل فيه ملحق تحت تقدر تركب مكينة المكيف عليه للغرفة ؟اذا كذا فخلاص مافيه اي مشكلة |
الساعة الآن 11:09 PM. |
Powered by vBulletin® Version 3.8.4, Copyright ©2000 - 2024, Jelsoft Enterprises Ltd. TranZ By
Almuhajir
F.T.G.Y 3.0 BY: D-sAb.NeT © 2011
HêĽм √ 3.1 BY: ! ωαнαм ! © 2010