منتديات للبناء فنون - الله يسامحهم ..

صباح الخير للجميع ..
ابي من الجميع الدعاء ثم الدعاء ان الله يشفي ابني فالح عمره سنتين ونص ينام الآن بقسم الاطفال بالمستشفى مع أمه الله يكتب لها الاجر .. هذي القصه
قبل تسع ايام راجعت بالولد بطوارئ المستشفى العسكري وكان عند الولد خلل في التوازن يعني يمشي واحياناً يطيح . شافته دكتوره وكان فيه دكتور ثاني اتعمدت ادخل على الدكتوره بحكم قربهم من الاطفال اكثر من الرجال . طبعاً كلهم ليسو متخصصين في الأطفال شافت المشكله ومشت مع الولد في ممرات المستشفى وطلبة من الدكتور يساعدها في تشخيص الحاله ولكن الدكتور فاجأني برده الولد ما فيه الا العافية قلت يا دكتور انا اعرف ولدي ولدي عنده خلل في التوازن اطلب لي اخصائي اطفال . قال اذا تبي تتطمن بكره جبه للعيادة وقابل الدكتور . رحت للبيت كان الوقت متأخر وكان عندي دوام الصباح قمت كان الولد نايم طلعت اداوم و بالأتصال تطمنت انه صار ممشى الولد طبيعي قلت اجل كلام الدكتور صحيح الولد طيب ان شاء الله .
وبعد سبع ايام من هذه الحاله وفي يوم الجمعه الماضيه جاه اسهال و ترجيع اكرمكم الله وهذه كانت اعراض التهاب في الدماغ وديته لمستوصف ولسوء الحظ كان الطبيب المناوب يوم الجمعه ليس متخصص بعلاج الاطفال .لم يشخص المشكله بشكل صحيح اعطانا علاج اسهال وترجيع وطلعنا .
من ركبت السياره والولد جااايه خمول لا هو نايم ولا صاحي ينام ويرجع يصحى . بعد ما وصلت البيت نام الولد نوووومه عميقة اصحية يتعشى ويرجع ينام قلت يمكن تعبان خلوووه ينام وان شاء الله بيكون طيب في الصباح ..
على ان الدعوى اسهال عااادي وبسيطه .
تفاجأت قبل صلاة الفجر امه تصحيني قوم الولد موب طبيعي اصحيه ما صحى وعيونه غريبه على طول قمة واخذت الولد ولفيته في البشت حقي اخذت امه واتجهنا للمستشفى العسكري بحكم امكانياتهم واللي يبعد عنا 100كم مقارنه بالمستشفى العام . ومن حسن الحظ ان فيه نقطة تمركز للهلال الاحمر في منتصف الطريق دخلت السيارة عندهم وبسرعه بديت اصحيهم من النوم معي حااااله اغماء خطره جدا .
بسرعه تفاعلوا مع الوضع وشغلوا سيارة الاسعاف جبت الولد وركبته في الاسعاااف علشان مسافة الطريق يكون المسعف سوى له شيء . قلت انا قدامكم بالمستشفى وصلت المستشفى استدعوا اخصائي اطفال واستشاريين وصلت الاسعاف نزلنا الولد وقف الاطباء مذهولين غيبوبه تامه لا حركه ولا شيء . قالهم المسعف بسرعه اعطوه جرعة جلوكوز السكر منخفض جدا و كانت الحرارة منخفضه جداً المسعف تعرف على الحاله وهو في الطريق ما شاء الله عليه الله يوفقه دنيا و آخره ويرزقه من حيث لا يحتسب .. سوو تحليل سكر واعطوه جلوكوز و مضادات حيويه نقل الولد للعنايه المركزه و مع التحاليل والاشعات المبدئية , اتضح انه يعااااني من التهاب فيروسي في الدماغ و نزيف متوقف وضمور جزء بسيط من الدماغ .. والحمدلله على كل حال ..
برحمة الله وبقدرته بدأ الولد يتحسن شوي شوي صار يحس بعد ان كان الدكتور يمسك بمسمار ويقول شاهد ابنك لا يحس ويعطيه وخزااات بكامل الجسم قلت بيشفيه وبيعااافيه الله ان شاء الله ..
وسبحاااان الله اليوم الثاني وانا متجه للمستشفى علشان اشوف ولدي في العناااية جاني اتصال من المستشفى رديت وانا اقول الله يستر .
قال ابنك طلع في قسم تنويم الاطفال حالته مستقره نسبياً . قلت الحمدلله رجعت على طول لأمه اللي ما نااامت من الليل تبي تشوووف ولدها . دخلت عليها وقلت يالله فالح يبيك ترااافقين معه طارت من الفرحه ما صدقت خذت اغراضها وطلعت معي واللحين هي مرافقة معه .. بالصدفه قابلت الدكتور اللي يقول ابنك ما فيه شيء في الطوارئ وانا مااار عليهم مسكني على جنب وقال الحمد لله على سلامة الولد وابيك تسامحني على تصرفي معكم .. ترى انا اسأل على طول عن ابنك والحمدلله متحسن كثير .قلت انا مسامحك لكن الله له حكمه من هذا ..
فسبحان الله وبحمده سبحان الله العظيم .

اللي يقرأ رسااالتي هذي يدعي بظهر الغيب ان الله يشفي فالح و يسهل امر تحوووويله ويشفيه من اللي فيه .. مشكورين