|
استفسار ومساعدة بخصوص القبو-بدون دورة مياة-مكيف مخفي
1 مرفق
بسم الله الرحمن الرحيم إن شاء الله انا نويت ابداء البناء بعد الحج وارجو مساعدتك واستشارتكم في الأفضل انا عندي قبو وصورة المخطط ارفقتها عشان تكون واضحه.لكن عندي مشكلتين وما ادري كيف احصل افضل حل يريحني وبدون ما اتبهذل اذا بديت البناء 1. ناوي اتعاقد مع شركة تكييف بخصوص مكيفات القبو تكوت سبليت مخفي. تصريف الموية للمكيفات وش الدبره فيه. انا قراءة في كتاب مهندسنا ماجد (ملاحظة: في حالة عدم وجود دورة مياه او بياره في القبو بالامكان وضع غرفة تفتيش 50 في 50 سم وتمديد التصريف لها وعشان كمية الموية بسيطة راح تنزل للارض) هذا الحل انا حاطه ببالي بس متخوف من موضوع انها تنزل للارض وحتى لو كميات قليله لو فيه حل افضل اتمنى تشورون علي؟ وحتى لو كانت فكرة البيارة في القبو بتريحني راح اسويها واخليها بس لتصريف موية المكيف بس هل هذا حل عملي ولا بيسبب لي مشاكل 2. ارتفاع السقف في القبو كم اخليه؟ انا راح يكون عندي تكييف مخفي وجبس وشبابيك للقبو وهنا المشكله في الشبابيك. المهندس يقول خلها 70 سم عشان تكون اكبر وافضل بس مادخلت مخي لاني كذا برفع القبو كم عن مستوى الحوش؟ عشان الشبابيك والجبس والتكييف؟ نصحوني اخليها 40 سم و30 سم للجبس والتكييف. هل هذا افضل شئ وبكذا ما يصير عندي ارتفاع عن الحوش الا 70 سم المجموع الكلي؟ شاكر لكم وللقائمين على المنتدى |
هلا بك أخي الكريم دعواتنا لك بالتوفيق أن شاء الله مساحة القبو لديك جيدة وهنا يجب وضع دورة مياه للقبو ليصبح مرفقاً متكاملاً فيما يخص النوافذ من وجهة نظري أن يكون منسوب الفيلا مرتفعاً عن الحوش بحدود 45سم كحد أقصى أي ثلاث درجات إضاءة ونوافذ القبو يمكننا توظيفها بشكل أفضل من رفع القبو أتمنى وضع مخطط الموقع العام ليتسنى لنا تحديد الأفضل لنوافذ القبو ارتفاع السقف من الجيد أن يكون بحدود 3.5م فعند الانتهاء من أعمال التشطيب سيكون الصافي بحدود 3م بعد الجبس والبلاط للأرضيات تحياتي |
شكرًا اخي م. ماجد على ردك والله يوفقك
بس انا جديد في عالم البناء.. ممكن اعرف ايش تقصد بالمخطط العام للموقع؟ قصدك المخطط كامل لكل دور ولا الصوره الاولى بالمخطط اللي فيها الإرتدادات؟ بخصوص دورة المياة في القبو كانت موجوده مكان المستودع في الصوره اللي ارفقتها بس الغيته خوفاً من الروائح! عشان كذا تنصحني ارجعها مع وجود بياره صغيره بالقبو ولا ايش تشور علي؟ الدور الأرضي راح يكون زي ما أشرت ٣.٥ والثاني نفس الشئ بس الشقه بالسطح بتكون الارتفاع العادي انا بس مشكلتي بالقبو الله يبيض وجهك ويجزاك خير على كل جهد تبذله لاخوتك في المنتدى وانا من ضمنهم :) |
هلا بك طال عمرك مخطط الموقع العام اللي يوضح فيه المبنى والأسوار والملاحق الأرضية بالحوش إن وجدت لنتمكن من اقتراح نوافذ أرضية للقبو وهذه جميلة وتجنبك رفع المبنى لأجل النوافذ "بيارة القبو" في غاية الأهمية ولا خوف من الروائح وخلافه فكأنها شيء غير موجود لا تشيل همها بالتوفيق |
اهلين طلال بن مشعل،
- وجود دورة مياه بالقبو ضرورية جدا، افضل من الطلوع و النزول لدورة مياة الدور الأرضي، و هذا يجبرك وجوبا عمل بيارة للتصريف، و مثل هذه البيارات معمول بها بكثير من الفلل و لا يوجد لها إي تأثير يذكر، أقل شيء يكون بالقبو مغسله. - بالنسبة لتصريف ماء التكييف، أفضل عمل أحواض زراعية بسيطة و تحويل تصريف ماء التكييف إليها للسقي، حتى لو كانت كمية الماء قليلة تضل أفضل من تحويلها للبيارة. إستفادة من الماء تؤجر عليها لإحياء الزراعة. - رفع سقف القبو و تركيب نوافذ بإرتفاع 40 أو 35سم في نظري غير مجدي من الناحية العملية، و بسبب لك كتمه و عتمه بالقبو، سبق و طبتها، و الآن تفادي ذلك عملت الطريقة التالية: عمل جزء من القبو مفتوح على الإرتداد و سقف القبو بنفس منسوب أرضية الحوش و اسفل هذه المنطقة المفتوحة الأحواض، : *تهوية أفضل *إنارة طبيعية *رفع القبو عن منسوب الحوش *عدم حفر الأرض بعمق أكبر *توفير بالتكاليف، لإن كل 10سم إرتفاع بالمتر الطولي يكلف مبلغ و قدرة. - إرتفاع السقف 3.3م و مخصوم منها 40 للتكيف و 20 للجبس، الصافي لك 2.7م. تقبلوا مروري و لكم خالص التحية دودي خالد |
اقتباس:
يرجى تزويدنا بالصور لمزيد من الفائدة والتوضيح |
| الساعة الآن 12:15 AM. |
Powered by vBulletin® Version 3.8.4, Copyright ©2000 - 2025, Jelsoft Enterprises Ltd. TranZ By
Almuhajir
F.T.G.Y 3.0 BY: D-sAb.NeT © 2011
HêĽм √ 3.1 BY: ! ωαнαм ! © 2010