منتديات للبناء فنون - حــكايـة فــتاة أرادت الــزواج

حــكايـة فــتاة أرادت الــزواج

ترويها الفتاة نفسها وان شاء الله تعجبكم http://www.alshrqy.com/vb/images/smilies/smile.gif

كنت قاعدة اتفرج على التلفزيون متابعة مسلسل وجا مشهد زواج وحده من الانسان اللي تحبه من زمااااان...

قلبت القناة على قناة Fuziah (لحد يسألني ايش هي قناة فوزيه)
لقيت عرض ازياء فساتين عرايس ، قلبت القناه لقيت خطوات وضع مكياج العروس ،
سكرت التلفزيون وصرت اتنهد ،، التفت على ابوي اللي نسيت تماما انه قاعد جنبي ،، قال لي ابوي:
خير ان شاء الله يابنتي؟! وش فيك؟ عسى ماشر؟
انا تلخبطت ساعتها وفتحت له التلفزيون وقعدت ساكته...
ايه اكيد بسكت ايش اقول؟ اقول له ودي اعرس؟؟؟
(يعني اتزوج بالعربي)... اقول له ان صاحباتي اغلبهم تزوجوا http://www.alshrqy.com/vb/images/smilies/no.gif
ولا اقول له اني تمنيت اكون مكان بنت خالي في كوشتها
وفي الزفة امس؟ يقطع الدراسة وسنينها ياشيخ...
اوف والله هم وغم يا بخت جداتنا ماتطق الوحدة الـ 10 سنين الا وهي مخطوبة وعلى الـ 12 اعرست
وان وصلت البنت 18 ما اعرست قالو عانس!!! هذوليك البنات اللي عايشين صح مش احنا اللي نعجز ونوصل سن اليأس مااعرسنا
اااخ يبه الله يفتح عليك وتخليني اعرس... وتفكني من الدراسة...
وبينما انا غارقة في قاع هذي الهواجيس ويرن التلفون ويقطع حبل افكاري... طالع الرقم ابوي وقال رقم غريب...
رد بلهجة رسمية:
-وعليكم السلام ، الله يسلمك ، الحمدلله بخير ، ايه انا ابوفلانة (مش قايلة اسمي بشاير عشان محد يعرفني ويضحك علي :p)
لا منت غلطان انا هو ، ماعليك زود الله يسلمك من معاي ياخوي ماعرفتك ؟والنعم تفضل وش السالفة اللي تبيني فيها؟
لا ماني مشغول ،، لهالدرجة الموضوع مهم؟! تفضل تكلم شغلتني...
والتفت ابوي علي وعطاني نظرة غريبة
انا ساعتها قرصني قلبي!! مو من ردود ابوي بس من نظراته الغريبة
رد ابوي على المتصل: وش فيها زود طيب؟... لا بس مافيها أي ميزات عن الباقي...
طيب وبعدين ،، ايوة ،، طيب ايش اسمك الكامل؟ وايش تشتغل بالضبط؟
طيب من دلك علي وعطاك رقمنا؟ لا الموضوع يا ابني مو بهالبساطة ،، العملية مش بيع وشرى وبس
الواحد لازم يسأل كثير ويحرص قبل مايقدم على أي خطوة ، لا موضوع انك تجي لبيتنا خليها بعدين ، لين اسأل عن كل صغيرة وكبيرة
لا لما اكتفي من السؤال واخذ المعلومات اللي تكفي بتصل عليك تجي ونتفاهم ويكون خير ان شاء الله
انا كنت اتابع حركات ابوي وانا طاااااااااااايره من الفرحة...
اخيرا انخطبت وبتزوج مثلي مثل غيري...
يوووووه أخيرا بلبس فستان ابيض منفووووووش
اخيرا بطلع اجهز واتقضى للزواج... بسوي زواج كبير مررررررة وبحط زفة ريميكس وطرحتي مابيها خليجية لا بخليها مبتكرة...
منيرة ماراح أعزمها هي وخواتها لانهم ماعزموني الاسبوع اللي فات على الدي جي اللي سووه...
وحصة صديقة امي ماراح اعزمها بعد مالي خلقها تحوسني لو حطيت اورغ...

وبشتري اغراض واشيل واحط واخطط... بيصدع راسي بس ولو صداع لذيذ...

يوم قفل الخط ابوي التفت علي وهو مبتسم

ابتسامة تعجب وهو ساكت... قلت:
- هاه يبه؟ متى بيجي يشوفني؟
- منهو
- هذا اللي خطبني تَو
- وشو؟!!!
- خطيبي اللي تَوه كلمك
تموووووونين انتي ووجهك صار خطيبك على طول ماعندك وقت ؟؟؟؟؟؟
- ايه يبه ترى احذرك هالمرة !!! شف: تكرش العريس مثل ماكرشت ولد ام مساعد السنه اللي فاتت
للحين تراها حازة في نفسي ترا هالمرة بضرب عن الدراسة... ولا الاكل مقدر اضرب عنه...
والرسول عليه الصلاة والسلام حث على تزويج من ترضون دينه وخلقه... وهذا قايل قلبي انه اجودي

ترا مااعرفه بس اتوقع انه كذا... وترا العرس اهم من الدراسة عشان الجنس البشري ماينقرض.... وبعدين من قال لك اني مش مكمله دراستي والله بكمل

حسيت ان عيون ابوي بتطلع من شدة علامات التعجب اللي في وجهه ،، بعدين انفجر من الضحك

هييييييي انتي وين رحتي حدك حدك لا تشطحين!!!
- وش اشطح؟ هذي الحقيقة والحقيقة ماتزعل وانت الله يطول لنا بعمرك علمتنا على الصراحة وحب الحقيقة
أي عريس واي هم؟؟!!... انتي مصخنة؟؟ ... هذا مندوب شركه يبي يجي يوريني المكنسة الكهربائية العجيبة على قولته اللي تغسل وتنفخ وتطبخ خخخخخخخ....
قومي نامي يابنيتي ولا تكثرين قعدة قدام التلفزيون... الحين بس عرفت ليه سكرتيه تَو...

الله يقطع ام العجلة اللي تعرفونها...

http://llbf.com.sa/vb/images/icons/icon10.gif