استفسار عن توصيل الانترنت واسلاك كات 6
 

قرأت كثير شروحات عن توصيل الانترنت للمنزل عن طريق سلك cut6 خارجي
بس بصراحه مافهمت
يعني هالسلك لازم اوصله لجميع الغرف ؟؟
وكيف طريقته بعد التمديد انا ابي كل البيت يصير النت قوووي خاصه مع العوازل والملاحق الخارجيه هل يصير بكل مكان مودم للتوزيع والا كيف ؟؟

الله يجزاكم خير
الكهربائي الحين ينتظر

تبين للغرف جميعها

اذن مع تسلييييك الدش

لكن اختي نصيحه

الآن الوايرلس هو المتسيد

البرودباند هو الحاضر و بإمكانك توصلين لكل غرفه عبر قطع كهربائية موجوده في اكسترا

الززززبده خساير و اخرتها نت بطيءءءء

والله حيرتني
انا راح امددها مع السنترال بس بعد التمديد كيف طريقته يعني يتركب مقوي في كل مكان والا مقوي واحد في مكان واحد
تكفون اللي عنده معلومات لا يبخل علينا

انا كنت بأسوي زيك لكن هونت

هناك مقوي اشاره من المودم عن طريق الكهرباء

انا شفته بإكسترا

ع العموم امسكي الكهربائي وقوليله مدد لي اسلاك لكل غرفه وجهزي الاسلاك

تصدقين حتى كاميرات المراقبه ما يحتاج اسلاك الحين

الوايرلس افضل حل

اختي حطي لكل دور مقوي واير لس . والملحق الخارجي مقوي احسن لك و أوفر مادياً .

يعني مثلا تبي مقوي للملحلق مددي له كيبل كات 6 . وكذالك الدور الأرضي بنصف الدور مددي كيبل يكون فيه مقوي . وكذلك الدور الأول . بالتالي تحتاجين فقط تمديد لثلاث نقاط . بدل ما تمددين لكل غرفة ..

ينصح بأن كيبل الكات يتمدد لحالة بعيد عن الكهرباء والدش

اتمنى الفكرة وصلت

لو سمحتوا وشلون مقوي مع الكيبل

ممكن احد يتبرع ويشرحه بالتفصيل لاني موب فاهم شي ابد

التمديد لكل غرفه سلك كات 6 يفيد اذا اردت تشغيل سيرفر بخط نت او عمل سيرفر مركزي وتوزيع مثلا الافلام على الغرف فهنا السلك اسرع واظمن في ارسال البيانات ... اما الواير ليس فلا يفي بالغرض.

شكررررا لكم جميعا ماقصرتو

الحين اللي فهمته انه نوصل ماسوره ٢ بوصه مثلا من العلبه اللي في الجدار الخارجي للفيلا الى مكان توصيل المودم داخل البيت بخط مستقيم
ثانيا من مكان المودم يوصل السلك الى كل غرفه ارغب بوجود النت فيها
والمهم انه التوصيل يكون مباشر من مكان المودم الى مكان الغرف من غير تقطيع في السلك

انا الى هنا فاااهمه بس اللي مافهمته بعد توصيل الاسلاك وش استفيد يعني كيف بيكون النت قوي لجميع الغرف هل اشبك على السلك مقوي او ايش فهموني تكفون !!!!

رايكم بعد وش انسب مكان للمودم والسنترال لاني بحطهم جميع في علبه ومسار واحد ؟؟

المرحلة الاولى : راح يجي من الشارع خط للتلفون بماسورة كهرب عاديه ومعاه بجانبه خط ثاني بماسورة 2 بوصة للالياف البصرية تكون فاضيه للمستقبل وكلا الماسورتين تذهب الى علبة التجميع داخل البيت يفضل ان يكون بمكان ميت تحت الدرج مثلاً .
المرحلة الثانية : ينطلق من علبة التجميع خط مستقل الى كل غرفه/صالة اي لكل غرفه او صالة خط مستقل او مع السنترال من علبة التجميع اللي تحت الدرج الى كل غرفة وصالة .
ثم تركيب فيش خاص بالنت مثل فيش الكهرب يتم توصيلة بكيبل الشبكة في كل غرفة/صالة فبهذه الحالة اصبح لدينا في كل مكان فيش للشبكة نقدر نوصل أي جهاز فيه مثل التلفزيون /الكمبيوتر / الرسيفر/البلايستيشن /او جهاز وايرلس يقوم ببث النت اللي يسموه بعض الشباب مقوي وايرلس / او اي جهاز وذلك من خلال وصلة كيبل صغير من الفيش الخاص بالنت الى الجهاز المراد استخدامه .
راح يكون بجانب علبة التجميع تحت الدرج التالي :
- خط التليفون اللي جاي من الخارج .
- جهاز المودم العادي الخاص بالنت .
- جهاز راوتر لتوزيع اشارة الانترنت على جميع الاسلاك الي رايحة للغرف والصالات .
المخطط راح يكون التالي باختصار :
خط التلفون >> علبة التجميع >> يركب خط التلفون بالمودم >> يوصل المودم بالراوتر
بوصلة سلك واحد صغير >> يقوم الراوتر بالتوزيع للغرف في آن واحد >> انترنت في كل غرفة وصالة .
اتمنى تكون الفكرة وصلت دعوااااتكم .

نصيحة : اذا تمديدات الكهرباء عندك من السقف
خلي تمديدات السنترال او الانترنت أرضي يعني تحت دفنية بلاط الارضيات .