|
استفسارات حول البناء وقرض الصندوق العقاري والعزل الحراري والمائي والتعاقد مع المقاول
السلام عليكم ورحمة الله وبركاته في البداية أحب أشكر القائمين على المنتدى والله يجزاكم خير ويكتب لكم الأجر الله يعطيكم العافية عندي استفسارات كثيرة أنا بإذن الله ببدأ في البناء خلال أقل من سنة والأرض إن شاء الله بشتريها قرييييب في مخطط جديد والحمد لله صار عندي معلومات مبدئية عن البناء وإن شاء الله بشتري كتاب الاستاذ ماجد الجزئين وأكيد بستفيد منه أكثر وأكثر ومادري القسم هذا مناسب ولا لا لموضوعي بس صراحة أنصح أي مبتدئ في البناء يقرا مواضيع القسم هذا .. من قبل امس وأنا أقرأ في المواضيع استفدت كثير وخاصة من ردود الاستاذ ماجد الله يعطيه العافية ويوفقه دنيا وآخره وكل من يساعد اخوانه في الاسلام :) في البداية إذا تنصحوني بكتب ثانية أكون شاكر لكم :) أول استفسار عن التكلفة المدينة: من المحافظات التابعة للرياض الارض مساحتها بتكون 600 تقريبا والبناء دورين منفصلين الدور الأول تقريباً 250 متر والثاني مثلها وملحق خارجي وممكن غرفة وحمام في السطح .. مع بداية البناء أقدر إن شاء الله يكون معي 400 ألف بإعتقادي إن شاء الله تكفي أبني العظم وأخلص من السباكة والكهرباء وانتهي من التلييس كامل أتمنى تفيدوني بخبرتكم إن شاء الله تكفي ؟ وبالنسبة للقروض ياليت تفيدوني بالنسبة للبنوك مافيه إلا خيارين قرض عقاري اللي يشترون البيت هم والقرض الشخصي ؟ مافيه طريقة ثانية يعطوني مبلغ كبير ؟ وقرض الصندوق العقاري أنا مقدم عليه في التقديم الأخير اللي بدون شرط الأرض وماعندي أي خبر نهائياً وش سالفته لا أرسلولي رقم طلب وأنا أصلاً من كلام الناس شايله من راسي ماراح يوصلني ولا بعد أكثر من 5 سنين مادري استجد جديد بخصوصه ؟ لو ملكت الارض أقدر استعجل القرض أو بأي طريقة كانت بحيث يعطوني ال500 ألف أو حتى 300 ؟ ياليت تفيدوني بهالموضوع الله يجزاكم خير والاستفسار الثاني بخصوص المقاول (عظم بمواد) المقاول ياخذ بالمتر ولا يحسب مواد العظم ويزود عليها فايدته ولا كيف ؟ وكم تكون فايدة المقاول تقريباً ؟ والكهربائي والسباك من شغل المقاول ولا لازم أتعاقد معهم أنا ؟ والكهربائي والسباك ينكتب معهم عقد بعد ؟ ومتى من البداية ولا بعد انتهاء العظم ؟ وطلعات المهندس المشرف كم مرة ؟ وكل مرة لازم يكتب ورقة فحص ووش صيغتها تقريباً ؟ ولو صارت مشكلة انشائية في العظم حتى لو بعد سنين يتحملها المقاول ولا المشرف المهندس ؟ يعني وش اللي يحفظ حقي على مدى سنين ؟! وبالنسبة للمخططات كم لازم يكون فيه مخطط مع التوضيح ؟ يعني المخطط الانشائي يخص وش بالضبط والمعماري ... الخ وبخصوص العزل المائي والحراري بالنسبة للجدران للحين محتااااااار وش نصائحكم ؟ غير الجدارين وبينهم عازل ماراح أقدر عليها بتكلفني والعزل المائي يكون في دورات المياة والمطبخ والسطح وسطح الملحق العلوي ؟ ودورات المياة والمطابخ تعزل بس حقت الدول الأول ولا بعد الأرضية ؟ والعزل المائي والحراري للسطح متى يكون بالضبط ؟ بعد اللياسة ولا بعد العظم علطول ولا متى ؟ والله يعطيكم العافية وآسف على كثرة الاسئلة :( وبإنتظاركم |
حياك الله اخي
400 الف راح تخلص لك العماره عظم بالسباكه والكهرباء وتليص كذلك انصحك تتفق مع المقاول بالمتر فقط --- يعنى المواد عليك تكتب عقد مع المقاول وكل اعمال البناء يتحملها المقاول تطليع الرمل للدور الثاني والاسمنت على المقاول انتبه يشرط عليك شي وتوافق قبل الاستشاره السباك والكهربائي تكتب عقد معهم قبل ان تبداء في العمل قبل ان تبداء يجب عليك اخذ اذن من البنك العقاري المخطط عباره عن ملف كامل تسلمه للمقاول ويتحمل اي خطاء عزل مايئ وحراري انا ما اقتنعت فيها .. تكلفه على الفاضي بيت الشيبان عمره 40 سنه بدون اي عزل ومافيه اي مشكله وفقك الله |
هلا بك أخي الكريم وسعدنا بتواجدك معنا في للبناء فنون ولا نملك لك إلا الدعاء بالتوفيق وبإذن الله تتسهل أمورك والجميع كذلك أخي لا بصراحة لا يمكن استحضار كافة هذه الأسئلة والرد عليها وأتمنى فضلاً طرح الاسئلة بشكل مختصر ليتمكن الجميع من مساعدتك الرد عليك فيما يخص التكاليف فإن 400 ألف جيدة وبإذن الله تنهي أعمال العظم وبعد ذلك ينظر بالمبلغ المتبقى هل يكفي لإكمال السباكة والكهرباء واللياسة أم لا التعاقد مع المقاول الأفضل والأوفر مادياً التعاقد معه مصنعية أي "شغل يد" وأنت تتولى إحضار المواد التعاقد مع السباك والكهربائي تكون من قبلك أنت ويتم مباشرة أعمالهم قبل صب خرسانة الميدة لعمل التأسيس اللازم الصندوق العقاري لا تتوفر لدي أي معلومات عن مواعيد الصرف ولا يمكن التنبؤ بها أبداً إذا كان مبلغ الأرض كبير فالأفضل أنك تأخذ الأرض عن طريق أحد جهات التمويل والمبلغ اللي كان يفترض تشتري فيه الأرض تضيفه إلى المبلغ الموجود لديك الآن وهو 400 ألف وتقوم بالبناء مباشرة بهذا المبلغ كاملاً والأرض تكون بالأقساط حيث أن قيمة التمويل للعقار تكون أعلى من قيمة التمويل الشخصي العزل الحراري مهم جداً خلال مرحلة العظم ينفذ فقط للجدران إذا لا تستطيع بناء جدارين فبعدها يأتي جدار واحد باستخدام بلوك أسمنتي معزول بالفلين العازل المائي خلال مرحلة العظم مهم جداً ويتم تنفيذه فقط لخزان المياه الأرضي العزل الحراري للأسطح والعازل المائي للأسطح ولدورات المياه يتم تنفيذه لاحقاً بإذن الله خلال مرحلة التشطيب بالتوفيق |
يعطيكم ألف عافية
أستاذ ماجد مافيه مشكلة بطرح الاسئلة خلال الردود وأتمنى منك ومن الأخوان الإفادة بالنسبة لردك (أنك تأخذ الأرض عن طريق أحد جهات التمويل) تقصد التمويل الشخصي ؟ يمكن مافهمتني المبلغ اللي ذكرته 400 ألف مايتوفر معي كاش المبلغ هذا من القروض الشخصية وحسبتها إن شاء الله مع بداية البناء وبعد ماناخذ القرض واللي يكون جمعناه يكون المبلغ 400 ألف التعاقد مع المقاول مصنعية بس صعب جداً لظروف العمل وثاني شي ماعندي خبرة عن المواد المطلوبة وأشوف وقتها وش أقرر وأتمنى اللي عنده خبرة عن قروض الصندوق العقاري يفيدني وبالنسبة للمقاول عظم بمواد ياخذ بالمتر ولا يحسب مواد العظم ويزود عليها فايدته ولا كيف ؟ وكم تكون فايدة المقاول تقريباً ؟ وأخ ماجد تنصحني بالبلك المعزول بالفلين ولا البلك الأحمر ولا الأبيض ؟ وإذا كنت تنصحني بالبلك الاسمنتي المعزول تقصد المعزول كامل ولا اللي يركب فيه قطع الفلين ؟ ترا اللي بتنصحني به بعتمده ان شاء الله :rolleyes: الموضوع هذا محيرني كثير |
بإنتظاركم يااخوان
|
لاتستعـــجل على عوار الراس
انت بتبني بعد سنه الله يعطيك طولة العمر وبعد سنه ماتدري وش يصير |
| الساعة الآن 03:06 AM. |
Powered by vBulletin® Version 3.8.4, Copyright ©2000 - 2025, Jelsoft Enterprises Ltd. TranZ By
Almuhajir
F.T.G.Y 3.0 BY: D-sAb.NeT © 2011
HêĽм √ 3.1 BY: ! ωαнαм ! © 2010